飛一般情懷（下） ─ 我和飛機有個約會

上回Kilowatt小隊帶大家遊走九龍舊區，追尋啟德機場留低嘅足跡，今次就帶大家來個屯赤隧道之旅，由屯門玩到赤鱲角！

第1站：屯門龍門居

搞甚麼飛機，第一站走到去龍門居？要應付成日行程，梗係要食飽先起行。龍門居食店林立，例如有開業廿幾年嘅手工燒賣，味道新鮮、魚香濃郁，夾帶幽幽果皮香味。又有齊柏林熱狗。想坐定定食嘅話，可以試吓熱門良心小店東屋台，主打大阪燒同牛肉飯 ── 大阪燒厚身足料，章魚、柴魚、粟米、椰菜等配料落得夠豪爽！仲要提一提，就係唔少「屯門牛」由細食到大嘅仙桃居，主打台式美食，推介大大份又好味嘅雞扒肉躁飯。

泊車建議可泊新屯門商場，有E-Charge易充站。

第2站：屯門浩和街

跟住嚟到屯門浩和街，話說疫情冇得飛，大家唯有努力捐窿捐罅周圍搵地方玩，屯門浩和街沿海堤壩就喺上年「彈起」，成為新貴好去處。呢度有一排排棕櫚樹、一大片草地同埋無敵大海景，所以就有Media叫呢度做「港版邁亞密」。Kilowatt小隊成員戴返個頭盔，似唔似Miami就唔敢講，不過真係幾靚！

浩和街對岸就係機場，所以嚟到呢度，梗係要睇睇飛機升降啦，帶埋張摺櫈就仲chill。亦都有唔少人會走上沿海堤壩慢步，吹著海風。沿住堤壩行到盡頭，有座小碼頭燈塔，係另一個打卡熱點，不過因為冇圍欄，大家千祈要小心啊。

提一提大家，呢度配套暫時未完善，例如冇洗手間同餐廳。如果想食嘢，就要自己帶入去，不過記得要做個有品嘅人，自己垃圾自己執！

第3站：屯門湖景邨+兆禧運動場

嚟到呢個住宅區，睇落平平無奇，但係又似曾相識？冇錯！就係喺呢度，造就出唔少《幻愛》出現嘅唯美浪漫畫面。井形設計嘅湖景邨就係戲中劉俊謙住嗰條邨，中庭有巨大天井，喺低層舉機仰視拍攝，可以影出幾何美影像。行返出去輕鐵蝴蝶站，旁邊行人天橋上，能夠捕捉輕鐵徐徐駛入站嘅畫面。

而喺附近、佔地超過4萬平方呎嘅兆禧運動場，亦係另一個熱點。兆禧運動場滿眼都係鮮明藍色同橙色，內外有多個精心設計嘅打卡位，都幾IGable㗎。

至於泊車建議可泊兆禧苑，停車場一上就已經係運動場，不過要注意一下，呢度係冇充電位嘅。

第4站：馬灣涌

離開屯門，穿過全長大約5公里嘅屯赤隧道，我哋直入東涌！因為下個目的地泊車都唔係咁方便，我哋一於先去東薈城飲杯嘢，順便泊車。北停車場有TESLA V2超充站、中電CLP充電站同AC充電站，南停車場亦有E-Charge易充站同TESLA V2超充站。

由東薈城出發，行到順東路，走上梯級會到觀景亭，可以睇睇景、吹吹風。離開觀景亭落山，走落梯級，會途經法定古蹟東涌小炮台，呢座炮台係喺清朝時代興建。離開炮台繼續向下行，就會去到一條被塵封嘅小漁村──馬灣涌村。馬灣涌村已經有近200年歷史，雖然鄰近逸東邨，但依舊保留一派漁村風情。昔日呢條漁村稱得上係東涌經濟重心，現時棚屋、村屋同各類小店並存，不時仲會見到舢舨同漁船停泊岸邊。

如果行到肚仔餓，可以試試村內東昇樓，除咗附近捕獲嘅海鮮，仲有秘製炭燒燒肉、鹽焗雞、炭燒鵝等，都值得一試。

第5站：機場維修區

離開馬灣涌，行大約8分鐘，去到北大嶼山醫院，然後我哋就可以搭S52號巴士「赴約」，前往喺赤鱲角西邊嘅機場維修區！

機場維修區係欣賞日落嘅絕佳地點，位於跑道盡頭，除咗可以輕鬆拍到「鹹蛋黃」之外，仲可以極近距離感受飛機喺頭頂上空劃過同降落，嗰種震撼，點形容都唔夠親身體會貼切！維修區前面係一望無際嘅水平線，後方係停機坪，可以見到各大航飛機停泊。唔少龍友都會專程去到維修區捕捉迷人影像。