香港洗車服務價錢資訊及比較

洗車最緊要係啲咩？當然係架車……講笑啫，出發洗車前，需要準備好所需用品，主要有以下幾樣：

清潔劑

車主可按車身顏色、車漆選擇清潔劑。一般而言，白色車一旦有灰塵就會好覺眼，反而細微刮痕就不太明顯，所以可以選用高洗淨成份嘅產品；相反，如果車身顏色較深，就毋須刻意追求高濃度洗淨成份，但最好避免選擇有研磨劑成份嘅產品，避免清洗過程中刮傷車身。

車主亦可根據需要去揀選唔同功能嘅清潔劑，例如防水垢、去膠迹、去油迹、含車蠟成份等。另外，玻璃同車鈴亦有各種專用清潔劑。

洗車毛巾

洗車毛巾種類五花八門，建議可選擇洗車海綿或超細纖維布。

高質洗車海綿可以簡單配合清潔劑打出濃厚泡泡，令清潔過程更輕鬆。因應材質同耐用程度，海綿價錢都有分別。至於超細纖維布型吸水力係普通毛巾幾倍，用來擦拭車身慳水慳力，而且唔使反覆擦拭，唔會傷害車漆。

吸塵機

吸塵機係用來清潔內籠沙石、灰塵及枯葉等。雖然部份車場都有提供，但風力就未必有保證，所以唔少車主自助洗車，都會自備無線吸塵機。

膠水桶

呢樣係經常會被忽略嘅工具，要裝水梗係要帶水桶啦！數量同大細就視乎洗車習慣。

部份自助洗車收費係以每節30分鐘計算，所以時間分配就好緊要。每個人嘅需要都唔同，Kilowatt 小隊就根據經驗，畀個清洗步驟供大家參考一下，等各位可以有個預算。

1. 開始之前，其實可以先噴定洗鈴水同鐵粉去除劑等，咁就可以用盡每分每秒！
2. 喺等待去除劑發揮作用期間，善用時間以泡泡槍噴射車身，大約花費2至3分鐘，再用海棉清洗
3. 使用高壓水槍，沖走泡泡
4. 嚟到呢步，可以視乎時間，如果時間充裕、自問快手，可以人手用洗車液再抹一次車身，或者視需要重點清理；完成後用高壓水槍沖洗
5. 用桶裝清水沖洗排水系統
6. 用高壓風槍將藏於細小位置嘅水珠吹出並抹走，然後用超細纖維布拭乾車身，千祈唔好遺漏門罅同車尾箱開合位呢啲細節
7. 使用吸塵機清潔車廂；可視乎時間及需要打蠟，以及為車軚上油等

如果真係唔夠時間，通常都可以補錢加時，加3分鐘、加7分鐘都有，所以都唔使太擔心。正所謂工多藝熟，洗多幾次就可以搖身一變成為時間管理大師，喺限時之內搞掂晒。利申返先，Kilowatt小隊入面有成員係自助派，主張自己愛驅自己洗，覺得咁先最有滿意感，仲話過程仲好治癒。如果有三五知己都係駕駛人士，仲可以約埋一齊洗車𠻹！

最後想呼籲一下，如果你有心水洗車好地方，不妨去呢度講聲，推介埋畀其他同路人。

1. 洗車前一定要清空雙手，戒指、手鍊、手錶等飾物都要除低， 以免刮花部車
2. 去到洗車場後，唔好咁心急洗車住，要先等架車冷卻；時間最好揀朝早或者黃昏，避開太陽最猛嘅時間
3. 避免喺風雨天氣洗車，如果唔係，洗完好快又鋪滿塵㗎喇！