寵物友善商場 2023

踏入2023毛孩家長可以帶佢地去邊度玩同放電呢？優先選擇嘅當然就係去寵物友善嘅商場啦！事關商場內有得食、有得玩，同心愛嘅寵物放電之餘仲可以打卡添，而且Kilowatt小隊又點少得幫大家揾埋最新商場泊車充電資訊～

寵物友善地點好去處

荃灣南豐紗廠 The Mills

南豐紗廠位於荃灣白田壩街45號。商場匯聚寵物友善、文青小眾、手工藝品等元素，係近年荃灣最熱門商埸之一。2022年首推「寵物紗廠遊踪」於場內商店及地標設有多個寵物打卡熱點，並根據地圖蓋印留念；亦有舉辦寵物市集、動物慈善義賣籌款、「寵物萌主選拔賽」等寵物元素嘅活動。商場內大部份都是寵物友善餐廳，其中F L E Ü R、Rooot、Labels Cafe + Bar更獲相當不錯嘅口碑！

寵物揮春工作坊
2023年1月9日-1月31日
地點 : The Ducksman and Hidden Gems (101號舖)
凡購物滿$288即可參加寵物揮春工作坊，和寵物一起寫出傳統新年揮春！

荃灣南豐紗廠停車場泊車資訊

私家車時租收費為HK$25。星期一至五憑最多三張即日消費單據消費滿HK$200以上可獲1小時免費泊車優惠；HK$300以上可獲2小時免費泊車。星期六、日及公眾假期消費HK$400以上可獲1小時免費泊車；HK$600以上可獲2小時免費泊車。

荔枝角 D2 Place

D2 Place位於長沙灣長義街9號。商場設有室內外寵物友善區，啱晒毛孩同主子們休息同放電！商場近年已多次舉辦以寵物為主題嘅市集，可以跟心愛嘅寵物參加活動同打卡留念。場內更有全港首間日式寵物超级市埸，有大量優質日本寵物食品及用品供毛孩同主子們選購。玩到又攰又餓嘅時候，仲可以去場內寵物友善餐廳例如Up a Notch Homemade Pasta & Pizza、友利冰室x 勿當奴、LITTLE BREAK COFFEE & KITCHEN。

荔枝角 D2 Place停車場泊車資訊

Kilowatt小編聽聞一啲停車場可能會要求寵物入寵物袋先可以進入，但小編打過電話俾D2 Place停車場職員詢問發現暫時無相關規定。而且現時星期一至日及公眾假期憑最多2張單據於指定商户消費滿HK$300可獲1小時免費泊車；滿HK$500可獲2小時免費泊車。

尖沙咀西九文化區

尖沙咀西九龍文化區係天氣唔好嘅時候可能會唔太方便，不過區內大片草地及活動空間就絕對係「毛孩天堂」！除西九藝術公園及海濱長廊歡迎寵物進入歇息、散步、認識其他寵物主人之外，其實西九文化區額外設有寵物區，可以俾寵物唔洗牽繩活動，而且配備寵物糞便收集箱和供水設備。 西九文化區內亦有具寵物特色嘅餐廳Hooman。Hooman嘅熱狗套餐都係以狗狗品種命名，包括哥基、貴婦狗和芝娃娃等；夏天時候更有透心涼嘅刨冰同雪糕可以消暑降温添！

西九文化區停車場泊車資訊

西九文化區共有A、B、E、F區及戲曲中心5個停車場，星期一至五每小時收費均為HK$28；星期六、日及公眾假期均為HK$32。星期一至五於任何一間指定餐廳、輕食店或美食車消費滿HK$200或以上可獲2小時免費泊車，星期六、日及公眾假期則是1小時；星期六、日及公眾需假期消費滿HK$400或以上才可獲2小時免費泊車。

新蒲崗 Mikiki

Mikiki位於新蒲崗太子道東638號，是屬於九龍市區罕見嘅寵物友善商場。場內有多間寵物用品店鋪，亦有寵物友善嘅商鋪，毛孩同主子們可以輕鬆一齊行商場同購物。不過要留意，Mikiki商場範圍內，小型寵物必須放在寵物車或寵物袋內，並將布篷扣好；中大型寵物亦必須戴上口罩，牽繩亦不可長於1.5米，同時亦不得攜帶寵物進入食肆及超市範圍。

新蒲崗Mikiki 停車場泊車資訊

Mikiki停車場每小時收費均為HK$24。內有4個Tesla V2超級充電站。而且Mikiki為新鴻基地產旗下商場，所以於商場內消費可用「The Point」App賺取積分並兑換免費泊車時數，全年一至日及公眾假期只需1200積分就可換領1小時免費泊車。