飛一般情懷（上）─ 啟德懷舊一日遊

雖然呢排嘉峯匯出位，但啟德最知名都係機場。啟德國際機作為香港象徵，係少數幾個位於大都市市中心嘅機場之一，機師必須在建築物林立嘅九龍地低飛並急轉降落。即使喺1998年關閉後，啟德機場仍然係航空史中嘅永恆傳奇。今次 Kilowatt就大家一齊漫遊九龍舊區，尋找啟德機場留低嘅印記。

第1站：樂富格仔山

今次旅程由樂富格仔山開始。格仔山原名叫九龍仔山，又名雷達山，係一座輕鬆易行嘅小山，只需半個鐘就可以行到上山頂，而呢座山仲充滿歷史故事。格仔山有啲似深水埗嘉頓山，位於市區入面，仲可以遠眺九龍仔風景。

格仔山舊時係啟德機場13跑道降落航道必經之路，機場嘅導航系統會將飛機引導去呢度，再由機師進行目視降落。由於要引導飛機行啱路線，就起咗導航燈同埋無線電導航設備，山丘亦髹上紅白相間格仔，因而得名。

啟德機場停用之後，格仔山就失去實際用途，亦一度被髹上灰色，直至舊年紅白格仔斜坡竟然驚喜重現，充滿歷史感。

想前往格仔山，可以由樂富公園按指示。至於泊車，會建議泊喺樂富廣場，有中電CLP充電站、Tesla中速充電站同V2超充站𠻹！

第2站：舊遠東飛行訓練學校

其實，九龍城嘅航空歷史並非只有啟德機場，遠東飛行學校都佔咗一席位。遠東飛行訓練學校喺1933年成立，係亞洲第一所航空學校，曾經吸引不少外籍人士同海外華僑來港就讀。

最初校址係位於啟德機場其他位置，經歷日治同機場跑道擴建時代，學校喺1959年搬到去機 場西南角嘅宋皇臺道。而家學校已經同其他組識合併為「香港飛行總會」，但當年興建Nissen Hut同大樓仲喺原址保留。

嚟得九龍城，晏晝當然仲要食泰菜醫醫肚啦，區內仲有唔少曾經表態嘅良心小店𠻹。

第3站：啟德跑道公園

作為回顧啟德之旅，行程當然繼續係同飛機有關啦。下一站我哋嚟到啟德跑道公園。顧名思義，公園係以啓德機場做主題，喺度除咗可以透過展覽認識啓德機場歷史，仲可以親身踏上跑道。啓德跑道公園有一片無敵大草地，加上兩邊臨海，陣陣海風吹來，好舒服。如果時間鬆動，喺度野餐就真係勁chill㗎。

草地旁邊有一條「啓德歷史軸」，展示舊機場由興建到搬遷去赤鱲角嘅歷史演變，仲有cute嘅紙飛機形狀櫈，當然唔少得仲有珍藏住黑白歷史相嘅展覽區啦。

行到公園臨海盡頭，會見到黃黑棋盤格仔。呢啲黃黑格仔就係舊時跑道開端，亦係飛機降落標記。地面上大字寫住「13／31」，原因係昔日呢條跑道稱作「一三跑道」或「三一跑道」，據講因為飛機升降角度分別係136°及316°，因而得名。

第4站：啟德空中花園

同樣位於前跑道嘅「啟德空中花園」上年5月先正式開幕，連接住連接郵輪碼頭及跑道公園。呢個係香港首個建於隔音屏障和行車道上嘅大型公園，面積大約兩公頃。空中花園中央行人路劃分為春、夏、秋、冬四個主題區，種植超過80種花草樹木，帶來四時轉換嘅觀賞體驗。

園景平台結構採用伸展式設計，係刻意模仿機身同機翼造型；至於北面半月形園景廊外形，就有參照機場內機橋設計。花園兩端寫上13、31兩組數字，亦係唔少遊人嘅「打卡位」，相當IG-able。

提提大家，泊車可泊啟德郵輪碼頭，有Tesla V2充電站同13A充電站提供。

第5站：新蒲崗

唔講你可能唔知，其實新蒲崗係啟德機場舊時嘅位置，而家嘅彩頤花園係空軍位置，可立中學曾經係跑道。新蒲崗工業區，亦是昔日機場範圍，甚至係舊機場跑道一部份。後來，啟德機場南移，舊跑道一帶就發展成工業區。為咗紀念飛機每天著陸歷史，政府取「著陸」諧音，將街道命名為「爵祿街」。爵祿街以北係新蒲崗八街，屬工廠區；而爵祿街以南係住宅區，土地用途劃分清楚。

一場嚟到，不妨行行八街，仲可以趁行街順便洗埋車先返屋企𠻹！

立即睇下集！飛一般情懷（下） ─ 我和飛機有個約會