【春の行楽地 2023】宮崎自駕3日遊，前進日本東九州！

除咗燒酎、衝浪、和牛，你對宮崎仲認識幾多？位於九州南部嘅宮崎縣，氣候溫暖，被大海同豐富自然資源所包圍。縣內有仲有唔少絕色自然景點，最適合春天一遊。今個春天，如果你有諗過遊走九州，不妨先玩完鹿兒島，再租車直落宮崎啦！事不宜遲，等Kilowatt小隊為你介紹 ── 春日東九州宮崎3日自駕遊！

2023 ToCoo! 日本自駕遊租車平台最新優惠碼「MC6O5M」， 馬上租車！

顧客只需於訂車填寫租車預約表格時，預約滿10,000日元輸入優惠碼「QK4XGD」，即可減免1,000日元。「MC6O5M」預約滿50,000日元減2,000日元。詳情可瀏覽【日本租車自駕遊】ToCoo! 租車慳錢攻略！。

第一日

1.飫肥城

講起九州名城，熊本城大家可能耳熟能詳，而飫肥城雖然名氣無咁大，但其實同樣位列「日本100名城」，相當值得一遊。同其他城唔同嘅係，飫肥城門外並無護城河，亦罕見地無天守閣。喺飫肥城跡內，最特別嘅反而係杉樹林城跡內名為「幸福之杉」嘅景點，由四棵杉木組成。據講只要企喺中央位置，就可以獲得幸福能量，係旅客到訪必去之地。

2.鵜戶神宮

宮崎有一個稱號叫「神話之鄉」，有兩座非常知名嘅神社，Day 1我哋先嚟到鵜戶神宮。鵜戶神宮係日本唯一一座建喺海邊懸崖洞窟嘅神宮，主要祈求結緣、安產、航海安全，呢度仲係傳說中日本第一代天皇神武天皇父親嘅出生地，神話色彩濃厚。一場嚟到，記得許下心願，將開運豆丟向懸崖龜石，祈求願望實現！

3.日南太陽花園

日南太陽花園位於日南海岸稍高嘅山崗上，園內有太陽之丘、天空塔、地球感謝鐘、瞭望台、餐廳同紀念品店等。不過講到全園焦點，一定落喺七尊摩艾巨石雕像上面。點解智利復活島嘅雕像會去咗日本？原來，以往由於部族鬥爭以及天災影響，原址大多石像都已損壞，係日本企業援助令摩艾石像得以修複。作為回報，日本被授權可以複製摩艾石像。7尊石像各自代表7種不同運勢，打卡之餘不妨觸摸一下石像，話唔定真係可以帶來好運！

4.富土の森

喺日南市富田川沿岸，不知不覺出現咗一片富土森林，喺森林中，唔單止有龍貓，仲有中龍貓、小龍貓，陣容鼎盛。原來，呢個龍貓係一個女女為媽咪特登建造。因為媽媽好鍾意龍貓，表示好想喺屋企養一隻龍貓，所以女女就連同建築公司員工一齊造咗呢隻大龍貓，後來向公眾開放。「願龍貓永遠守護你」、「希望幸福會降臨來睇龍貓嘅人身上」，見到告示嘅內容，真係感受到日本人嘅溫暖！

第二日

1.青島神社

前文都提到，宮崎有兩座好出名嘅神社，第二座就係即將會去嘅青島神社！神社所在嘅青島係一座小島，周邊地形非常特別，過去火山爆發所噴發出熔岩接觸海水急速冷卻，形成好似洗衣板一格一格、一層一層嘅獨特景觀，被稱為「鬼の洗濯板」。矗立喺神社入口，黃色郵筒亦係好多旅客必影嘅特色地標。青島神社以求姻緣聞名，吸引好多情侶遊客嚟朝聖。除咗去本殿參拜，仲有祈願古道、產靈紙縒、天之平甕、海積之拔、賽之目儀式等祈福景點，留待你慢慢探索！

2.食宮崎牛

日本牛肉品牌超過200種，當中包括大名鼎鼎嘅宮崎牛。要獲得宮崎牛嘅稱號，必然要係於宮崎縣內生產、飼養嘅黑毛和種牛，更要符合日本食肉格付協會 制定嘅嚴格分級標準。肉質等級達到4級以上嘅宮崎縣產黑毛和牛，先有資格稱為「宮崎牛」。Kilowatt小隊就推介「一葉 Miyachiku （一ッ葉 ミヤチク）」，呢間餐廳CP值相當高，除咗可以一邊望住海景歎靚牛，廚師仲會即場料理，等你享受一場色香味俱全嘅饗宴。

3.植物園 Florante 宮崎

溫暖春天腳步漸漸嚟到，一場嚟到氣候溫暖兼且以花旅聞名嘅宮崎，梗係要來場花之巡禮啦。園內有整備良好嘅草坪、各種不同主題花園，以及有各式各樣植物嘅溫室。喺「街景樣本園」內，有日式、西式、田園風等唔同主題嘅房屋，以及對應風格嘅造景花園，作為旅客設計花園嘅靈感。喺春天，植物園會用萬紫千紅嘅花卉點綴園區，舉辦「春之FLORANTE節」，係縣內相當受歡迎嘅活動，絕對唔可以錯過。

4.鳳凰自然動物園

春天在動物園散步才是正經事。嚟到宮崎，必定要一遊鳳凰自然動物園。呢度飼養咗大約100種、共1,200隻動物，你可以觀賞到來自世界各地嘅動物，包括非洲獅子、馬賽長頸鹿、歐亞大陸繁衍嘅老虎同猩猩、北美野牛、南美水豚同松鼠猴，以及大洋洲袋鼠同鴯鶓，真係包羅萬由。呢度每日仲會舉辦各種活動，例如智利火鶴嘅飛行佛朗明哥表演，以及山羊大規模遊行等等，包你盡興而歸。

5.垂水公園

垂水公園以120 米高垂水台命名，景觀雖然獨特，不過點都唔夠春天嘅主角搶眼──就係呢度超過3000棵櫻花樹！作為賞櫻名所，垂水公園嘅櫻花歷史悠久，相傳最初係由當地武士所種植，得到後人悉心照料，最終開枝散葉。呢度嘅櫻花品種包括染井吉野、山櫻、八重櫻、寒櫻等，形成一條蜿蜒2公里嘅櫻花路。賞櫻時節仲會有夜櫻大會，萬勿錯過！

6.索雷斯特高千穗酒店

玩咗成日，梗係舒舒服服住返晚，第二日再繼續行程啦！Kilowatt小隊推介入住呢間索雷斯特高千穗酒店，喺2018年開業，屬於較新嘅酒店。喺日本神話故事，高千穗係眾神降臨之地，會帶來希望同光明。酒店濃厚嘅歷史同神話氣息吸引好多旅客造訪，更加榮獲Jalan 2021 最佳住宿酒店大獎（51-100室）冠軍！酒店距離知名景點高千穗神社、高千穗峽、國見之丘都非常近，地理位置佔盡優勢！

索雷斯特高千穗酒店一晚住宿一泊二食$1,104起， 立即查看更多。

第三日

來到旅程最後一日，我哋會專心玩高千穗。由於天照大神鐵道（天空小火車）不接受預訂而且每日班次有限，建議泊車後先去車站大樓購買車票，然後正式開展行程！

1.高千穗峽

高千穗峽係好多人去九州必玩嘅絕景秘境，係橫跨五瀨川嘅峽谷。過去阿蘇火山爆發，噴出火山碎屑流沿住五瀨川流出，經過急速冷卻後，形成咗高千穗峽。呢度全長約7公里，斷崖高達百米，十分壯觀。高千穗峽旁邊有大約1公里遊步道，可以畀大家漫步欣賞高千穗峽。

2.觀光小船

雖然漫步喺千穗峽已經相當令人深刻，但如果想更進一市的話，就一定要試試搭船觀光，享受截然不同嘅觀賞視角。由人手划船穿越溪谷，每艘船限乘3人，可以喺30分鐘內盡情將絕美景致盡收眼底。搭船仲可以前往日本瀑布百選之一嘅真名井瀑布旁邊，近距離觀賞超乎想像嘅激烈水花，超級震撼。

3.元祖流水麵

嚟到高千穗，當然要一嘗元祖流水麵。「千穗の家 元祖流水麵」創立於昭和30年，外觀非常古色古香。而喺度食麵都係一個特別嘅體驗，當店員呼聲一出，麵條就會順著水流而落，而且速度奇快，呢個時候，就要睇準時機，眼明手快將麵條夾起。除咗流水麵外，餐點仲有超具地方特色、當地人稱「山女」嘅烤櫻花鉤吻鮭，未夠喉仲可以食埋炭烤醬油糰子同雪糕！

4.高千穗神社

食完流水麵，下一站回程高千穗神社。神社擁有1900多年歷史，主殿被神木群團團包圍，當中仲有一對相連嘅夫婦杉。據講喺杉樹拖手繞行三圈，無論係親情、愛情定友情，感情都會通通變得更深厚。旁邊仲有個大嘅殿廳，晚上先開放，亦係演奏夜神樂地方，亦即係叫神樂殿嘅地方。

5.高千穗天照大神鐵道

要用最難忘嘅視角飽覽高千穗，當然必搭天照大神鐵道。由廢棄鐵道改成嘅觀光鐵道，就連日本人都慕名而來。呢度可以坐到天空小火車，小火車有一個露天車廂，部份車型腳底仲係以強化玻璃建成，可以360度觀賞美景。除咗會沿途導賞會景，最精彩係當駛經高達105米嘅高千穗橋梁，會停留畀大家恣意拍攝。過程當中，仲會有幻燈表演同浪漫泡泡，感覺就好似進入夢境一樣，絕對令人念念不忘！

2023 ToCoo! 日本自駕遊租車平台最新優惠碼「MC6O5M」， 馬上租車！

顧客只需於訂車填寫租車預約表格時，預約滿10,000日元輸入優惠碼「QK4XGD」，即可減免1,000日元。「MC6O5M」預約滿50,000日元減2,000日元。詳情可瀏覽【日本租車自駕遊】ToCoo! 租車慳錢攻略！。