西貢停車場，泊車充電站

聽個名係咪以為日文？呢間的確係一間日系雜店貨，但店名由來其實係成語「吉光片羽」。吉光係一種傳說中嘅神獸，吉光身上嘅一片毛，就好比殘餘僅見嘅文章或藝術珍品。顧名思義，舖頭賣嘅雜貨都係為數不多嘅精品同衣服。店主曾經表示，呢度嘅貨品「一件起，兩件止」。正所謂物以罕為貴，如果搵到一件自己鍾意嘅小物，又唔使同人撞，真係會有種「小確幸」嘅感覺，正如店家推廣嘅信念──待己寬容由穿衣開始！

地址：西貢市場街40號

西貢橫街有間隱世小店，專賣手工蠟燭產品，憑藉高質出品打響名堂。對好多人嚟講，西貢係放假郊遊嘅地方，但對店主Xavier嚟講，西貢就係佢成長嘅地方，自細就夢想喺度開舖頭。Xavier喺2012年成立手工蠟燭及香薰品牌BeCandle，2017年終於圓夢選址西貢開設實體店。蠟燭全由人手製造，提供二十多種精心調配嘅香味選擇，以及一系列與不同品牌攜手合作嘅香薰蠟燭。同時小店會喺星期五、六、日、一舉辦蠟燭工作坊，等更多香港人認識呢門小手藝。

地址：西貢萬年街102號

一家大細，想趁放假出外逛逛，又想小朋友學到新知識，一於去獅子會自然教育中心啦！獅子會自然教育中心有昆蟲館、魚館、貝殻館同農館，可以畀小朋友參觀同學習各種有趣知識。呢度仲有地質公園遊客中心同岩石學園，可以睇睇歷史奇觀。除咗館內展區，戶外仲有蝴蝶谷、蜻蜓池、荔枝園、柑桔園、濕地樂園等，啱晒學習階段嘅小朋友。

地址：西貢蕉坑