荃灣停車場，泊車充電站
探索荃灣的停車場、泊車充電站、泊車優惠、玩樂好去處
荃灣，自從80年代荃灣地鐵站開通之後，荃灣就慢慢發展成今日特別嘅「商場之城」。一出荃灣站，去區內大型商場包括附近嘅愉景新城、荃灣千色匯，以至荃新天地、荃灣廣場、海之戀商場等等，都唔洗「落地」，全部可以通過有蓋天橋去到。夏天唔怕曬；雨季唔怕濕身，紅綠燈都唔洗等。行商場可以行足一日，淨係呢一點就已經可以話係荃灣最有特色嘅地方。而且商場內不時都會有唔同嘅展覽同活動，例如車展、市集、主題區，唔會行嚟行去都係連鎖店！
荃灣泊車之選
荃灣停車場泊車優惠
荃灣充電站之選
荃灣好去處
荃灣廣場
荃灣廣場可以話係大人小朋友都啱玩嘅地方。商場天台自設兒童遊樂場，Kilowatt小編細細個就已經去荃灣廣場天台玩，經過20多年，場內已進行多次翻新及增添多個遊樂設施，而且仲有休憩地方俾大人坐住休息，睇住小朋友玩。當小朋友玩到攰，到大人行街，商場內不時亦會有車展、食品、市集、家電產品等展覽，每次去都會有強烈的新鮮感！
荃灣廣場地址：新界荃灣大壩街4-30號
悅來坊商場
悅來坊商場因為位於悅來酒店(熊貓酒店)下方，所以又稱為「熊貓酒店商場」。場內人流不算最旺，不過勝在氣氛休閑，有榮獲米芝蓮推薦(2015-2018)的殷悅中菜廳，又有適合一家大細食個下午茶嘅簡•味Tea Buffet。而且場內仲有荃灣唯一嘅奇趣天地，位於地庫一層B125號舖，有大量扭蛋和模型，大人小朋友買文具、精品、玩具都靠曬佢。
地址：荃灣荃華街3號悅來坊商場
荃灣景點
南豐紗廠
文青好去處—「南豐紗廠」有別於一般大型商場及連鎖店，南豐紗廠見證香港紡織工業由60年代開始的黃金時代，是目前南豐集團策劃的地標式保育項目。場內有藝術作品、手工藝店、大型展覽及活動，供情侶或一家大細參與。節日例如萬聖節期間會舉辦有獎INSTAGRAM攝影比賽、限量版DESIGNS IN AIR紋身貼紙換領活動等等。
地址：The Mills, 45 白田壩街荃灣
激安之殿堂Don Don DONKI
去開荃灣又點少得「DONKI」，買日本零食就一定架啦！不過除此之外，亦都可以留意其他日常家庭用品以及即食食品，例如戴開眼鏡、玩開相機嘅朋友，識買嘅就一定係買小林製藥Kobayashi嘅鏡面清潔紙巾，行DONKI行到攰嘅時候就可以去DONKI入面嘅Sweet Potato Factory買熱辣辣甜蕃薯，啱曬秋冬天食！
地址：荃灣大河道100號海之戀商場2樓2001號舖
荃灣食好西
神石燒牛扒水產專門店 (如心廣場)
「神石」可以話係牛肉以及飯桶嘅恩物，店內有供應美國產神石牛、安格斯、日本及澳洲和牛，客人到自動售票機選擇心水牛肉部位和分量(唔食牛嘅朋友亦可選擇海鮮類)後，餐廳會以石板形式上菜，客人可自行調節牛扒生熟程度，店內白飯任裝，更適合食量較大嘅人士。
地址：荃灣大河道98號如心廣場二期2樓206號舖
和食快餐
「和食」可以話係窮人嘅恩物，Kilowatt小編由中學時代就開始食「和食」。一個飯或拉麵連飲品只需HK$40-$50，多年來少有加價。店內主打咖喱飯類和拉麵類，可配撘雞扒、豬扒、牛肉，可「加底」、「加菜」、「加蛋」，自由配搭，任君選擇。唔想食飯或拉麵嘅朋友，店內亦有供應日式餃子、壽司、冷麵等，基本上去到總有一樣啱你食！
分店 (a)：荃灣西樓角路荃昌中心昌寧商場地下23號舖
分店 (b)：荃灣曹公坊27號地下
